Uahistory.info

Битва київського князя Святополка і переяславського князя Володимира з половцями (1096 р.)

В се же время приде Боняк 1 с Половци кь Кыеву, в неделю от вечера, и повоева около Кыева, и пожже на Берестовемь двор княжь. В се же время воева Куря 2 с Половци у Переяславля, и Устье пожже, месяца мая 24 день. Святополк же и Володимер, поидоста всвояси. Сего же месяца приде Тугоркан 3, тесть Святополчь, (к Переяславлю), месяца мая 30, и ста около града, а Переяславьци затворишася в граде. Святополк же и Володимер поидоста на нь по сей стороне Днепра, и придоста к Зарубу, (и ту) перебродистася, и не очютиша их Половци, богу схраншю их, и исполчившася поидоста к граду; гражане же узревше, ради (быша, и) поидоша к нима, а Половци стояху на оной стороне Трубежа, исполчившеся. Святополк же и Володимер вбредоста в Трубежь к Половцем, Володимер же хоте нарядити полк, они же не послушаша, но удариша в коне к противным; се видевши Половци и побегоша, а наши погнаша в след ратных, секуще противьныя. И сдея господь в т день спасенье велико, месяца иулия в 19 день побежени была иноплеменници, и князя их убиша Тугоркана и сына его и ини князи; мнози врази наши ту падоша; на заутрье же налезоша Тугоркана мертва, и взя и Святополк акы тьстя своего и врага; (и) привезше и к Кыеву погребоша и на Берестовемь, межю путем идущим на Берестово и другымь в манастырь идущим.

Летопись по Лаврентиевскому списку. – С. 223-224.

1, 2, 3 Половецькі хани.

Хрестоматія з історії України. Посібник для 7 – 11 класів середньої школи. Упорядники: В. І. Гусєв, Г. І. Сургай. – Київ: Освіта, 1996. – С. 39-40.

 bytva_z_polovcajmy.rar [13.54 Kb] (викачувань: 1)